Nama oh Nama...

Namo den Zadariah. Entah apo sobab ei den diboghi namo Zadariah tak pulak den tau, yang den tau, kete omak aruah Long Nolek yang boghi namo tu maghin lopeh solosai dio buek kigho2 ateh koghoteh yang oghang lain tak bulih paham kocuali dio yo. Te omak den dek sobab solalu domam, namo den detuka ei monjadi Slimi (agak ei kok bahaso baku Salmi gek ei)..tompi ado yo yg den donga ugho2 nak boghi namo den Khuzaidah (nak dokek samo bunyi mo namo akak den Khuzaimay)..sobab apo tak jadi pun tak dapek den pasti an tu doh (ado satu kisah adik den nang namo Abu Zarin tu togah dek aruah Long Nolek yolah tu..hangat boto ati den..sobab ei den dah sughuh Abah rejistey namo ei Muhammad Ali sobab maso tu Muhammad Ali solalu monang boxing lam tibi). Bobalik tang namo den tadi..kokal la namo den Zadariah (kato ustaz Bahaso Arab den maksud ei pombawo bokalan..ntah bokalan apo pun tak dapek den pasti an..haghap2 amalan yang mulio la)..adik-boghadik, omak abah somo ei manggil den dongan namo kaklang, atuk Mapuh, uwan pun panggil kaklang, atuk Palang panggil den adik, uwan Palang panggil kaklang, oghang Mapuh somo manggil Slimi (bonci amek den nonga bunyi ei)..kengkawan maso sokolah ghondah pun panggil kaklang, tak ado yang manggil Zadariah..kocuali cikgu-cikgu. Bilo dah bosa sikit..den masuk sekolah Sains Gontam..di situlah den dapek namo baghu yang lobih glama..Mr. Rai (ngaja den Matematik) yang mulo an manggil den Zed..lopeh tu ado plak bokawan mo budak jantan kek sokolah tu..den gola an dio Mas  sobab joman tu coghito Indon selalu main lam tibi..mako muncul pulak namo Zed de Mas (bolambak namo tu..ateh mejo makmal..colah koghusi..ateh batang kaktus kek sekolah..topi dinding kelas..segalo yang bulih den tulihlah)..bogitulah akhir ei sampai ko unibesiti namo Zed tu kokal (tompi nang Mas ei dah gugur sobab cinto monyet tak sampai ko mano..ha..ha..). Sekaghang dalam kalangan anak2 mughid, dio oghang pun panggil den dongan namo Cikgu Zed...begitulah kisah den dongan namo den..Anak2 manggil den mama, laki den manggil den "yang"(jangan koluar bulu tolingo plak), anak2 buah bolah koluargo den manggil den Maklang, bolah laki den manggil Mak Uda..den dah bocadang..kok panjang umur sok, kok dapek cucu..nak sughuh cucu2 den panggil den nana..apo macam..ak gek ei (tompi bunyi ei 'nena'..ado slank oghang putih skit)..Laki den tu sok nak den sughuh cucu ei manggil 'tata' pulak..biar lain pado oghang lain..ghupo ei pun dah macam oghang2 sobolah nogoghi yang ado Salman Khan ngan Padhayappa tu, jadi kok donga dek oghang taklah topoghanjat bona doh kan..he..he..(mampuih kok debaco ei ni)..InsyaAllah kok panjang umur ko sanun dapeklah moghaso kono panggil nana dongan tata plak. Sekianlah coghito pasal namo den dulu..sok2 den buek coghito lain plak..ha..ha..(nak molughuih an pinggang jap).